A Consellería do Medio Rural publicou hoxe no Diario Oficial de Galicia (DOG) a resolución pola que se prolongan estas precaucións sanitarias, que estarán vixentes do 1 ao 30 de setembro, con posibilidade de prórroga segundo a evolución da enfermidade. A análise de risco realizada polos Servizos Veterinarios Oficiais aconsella manter estas medidas cautelares en Galicia.
As feiras, certames, poxas, mercados e concentracións de gando bovino continúan permitidas, sempre que os animais procedan de explotacións galegas. Os vehículos de fóra da comunidade deberán acceder limpos e desinfectados. Para concursos e exhibicións, requírese autorización previa da Dirección Xeral de Gandaría, Agricultura e Industrias Agroalimentarias.
Mantense tamén a vixilancia veterinaria oficial de 28 días para bovinos procedentes de fóra de Galicia. Os animais das granxas que incorporen gando doutras rexións quedarán inmobilizados cautelarmente durante o mesmo período. É obrigatorio desinsectar todos os bovinos da explotación e os vehículos de transporte que entren na comunidade.
A Xunta reitera a mensaxe de tranquilidade, xa que non hai constancia de casos en Galicia nin a enfermidade se transmite a persoas. A Consellería reclama ao Ministerio de Agricultura, Pesca e Alimentación (MAPA) maior coordinación, unha estratexia clara entre comunidades e que lidere na Unión Europea o desenvolvemento dunha vacina preventiva.
Tamén se solicita ao MAPA que se cambie a categoría da enfermidade, actualmente cualificada como A (a máis grave), e a súa inclusión nos seguros agrarios. A Dermatose Nodular Contaxiosa é unha enfermidade vírica de alta difusibilidade que causa prexuízos económicos, pero non afecta ás persoas nin ao consumo dos seus produtos.
