Técnicos do Concello de Ames e de Augas de Galicia avaliaron a necesidade dunha actuación transitoria na presa de Ponte Maceira, declarada Ben de Interese Cultural (BIC). O obxectivo é elevar a lámina de auga para asegurar a captación da potabilizadora e evitar problemas de subministro ante a situación de prealerta por seca.
A tenente de alcalde, Susana Señorís, destacou a importancia desta medida provisional mentres se agarda a autorización de Patrimonio. "Pediron autorización a Patrimonio para poder executar dita actuación, e agora estamos á espera de que dea unha contestación", explicou Señorís, quen tamén sinalou a complexidade da intervención nun entorno BIC.
A xerente de Augas de Ames, Genma Otero, indicou que a localización da presa é de difícil acceso, polo que será necesario contactar con empresas especializadas en traballos con grúas e maquinaria pesada para estudar as alternativas de actuación.
Esta medida provisional súmase ao proxecto de reparación definitiva da presa, cuxo deseño xa está redactado e que conta cun orzamento de 400.000 euros. Augas de Galicia será a encargada de executar esta obra, que busca garantir a captación de auga a longo prazo para o concello.
No lugar tamén estiveron o técnico municipal do Ciclo Integral da Auga, Esteban de la Fuente; a enxeñeira xefa de Augas de Ames, Verónica Castro; e o responsable da Brigada municipal de obras, Juan Calvo.
