O Museo de Historia Natural de Santiago acolleu a presentación da sexta edición da Noite Galega das Persoas Investigadoras (G-Night), que se celebrará o vindeiro venres 25 de setembro nas sete principais cidades galegas: Vigo, Ourense, Pontevedra, Santiago, A Coruña, Ferrol e Lugo.
Na presentación participaron representantes das universidades galegas e organismos de investigación, como Cristina Naya (vicerreitora da UDC), Ana Cabana (vicerreitora da USC), Rafael Comesaña (vicerreitor da UVigo), Patricia Quintas (CSIC Galicia), Carmen Cotelo (GAIN) e Eugenio Vázquez (Real Sociedad Española de Química).
O evento contará coa participación de máis de 500 investigadoras e investigadores que ofrecerán un programa con máis de 150 actividades gratuítas. O obxectivo principal é achegar a ciencia á cidadanía, fomentar vocacións científicas e proporcionar propostas de lecer educativo para todas as idades.
A programación inclúe obradoiros, experimentos, feiras científicas, roteiros, paseos en barco e xornadas de portas abertas, que se desenvolverán en rúas, prazas, museos e centros científicos, abarcando todas as ramas do coñecemento.
Coordinada pola Universidade de Vigo, a G-Night é unha iniciativa que reúne as tres universidades públicas galegas, centros do CSIC e outros organismos de investigación de Galicia, nacida ao abeiro da Noite Europea das Persoas Investigadoras.
O evento finánciase con recursos propios dos preto de vinte organismos do consorcio e conta co apoio da Xunta de Galicia, a través da GAIN, e coa colaboración da Real Sociedad Española de Química e de entidades locais.
