A axuda, concedida ao abeiro da Orde do 15 de xaneiro de 2026, forma parte dunha liña de subvencións para incrementar a ecoeficiencia na xestión de residuos municipais. A actuación conta cun orzamento total de 15.450 euros, financiado nun 60 % pola Unión Europea a través do Fondo Europeo de Desenvolvemento Rexional (FEDER) e nun 40 % pola Xunta de Galicia.
O proxecto contempla a incorporación dunha nova unidade móbil, de menor tamaño e maior manobrabilidade, que permitirá acceder a vías estreitas, aldeas e núcleos rurais onde os equipamentos de maiores dimensións atopan dificultades. Este novo punto limpo complementará o servizo municipal existente desde outubro de 2025, co obxectivo de ampliar a cobertura territorial e facilitar á veciñanza a entrega de residuos que non deben depositarse nos colectores convencionais.
A unidade estará preparada para a recollida diferenciada de nove tipos de residuos: pequenos equipos informáticos e de telecomunicacións, pequenos electrodomésticos, envases contaminados e aerosois, xoguetes e outros plásticos, lámpadas e fluorescentes, pilas e baterías, tóner e cartuchos de impresora, cápsulas de café, e CD e DVD.
O proxecto inclúe tamén formación específica para o persoal encargado do servizo, co fin de garantir a correcta manipulación, almacenamento e entrega dos residuos a xestores autorizados. Con esta actuación, o Concello de Brión busca facilitar a separación e reciclaxe de residuos especiais, mellorar o acceso ao servizo nas distintas parroquias e reducir os vertidos incontrolados.
O orzamento total da operación é de 15.450,00 €, sendo a subvención concedida de 15.000,00 €. O financiamento provén da Unión Europea (programa Galicia FEDER 2021-2027) cun 60 % (9.000,00 €) e da Xunta de Galicia, Consellería de Medio Ambiente e Cambio Climático, cun 40 % (6.000,00 €).
