O concello de Boqueixón acolleu a presentación de "Coa comida, Galicia sen desperdicio", a nova iniciativa da Xunta de Galicia para promover o aproveitamento alimentario. A conselleira do Medio Rural, María José Gómez, fixo entrega simbólica do distintivo ao restaurante O Balado, dirixido polo cociñeiro Roberto Filgueira, coincidindo coa celebración do Día Internacional de Concienciación sobre a Perda e o Desperdicio de Alimentos.
No acto, celebrado en Ardesende, estiveron presentes tamén o alcalde de Boqueixón, Ovidio Rodeiro, e o director xeral da PAC e do Control da Cadea Alimentaria, Juan José Cerviño. A conselleira destacou a importancia de aproveitar ao máximo os alimentos como forma de valorar o esforzo dos produtores, coidar o territorio e contribuír a unha sociedade máis responsable. Estas declaracións enmárcanse na Declaración institucional da Xunta aprobada polo Consello do Goberno galego.
A Xunta reafirma o seu compromiso coa prevención das perdas alimentarias e a redución do desperdicio en todas as etapas da cadea. A conselleira sinalou que a Estratexia de prevención, actualmente en elaboración polo departamento de Medio Rural, dará prioridade á prevención, promoverá a colaboración para aproveitar excedentes aptos para o consumo e impulsará a formación e a sensibilización.
A través desta declaración institucional, o Goberno galego recoñece o esforzo de persoas, entidades e organizacións que contribúen á prevención de perdas e á redución do desperdicio. Sublíñase o compromiso de seguir impulsando a formación en xestión de alimentos, así como de apoiar a investigación e a innovación para avanzar cara a unha sociedade máis saudable e responsable.
Segundo datos da Organización das Nacións Unidas para a Alimentación e a Agricultura (FAO) de 2011, aproximadamente un terzo dos alimentos producidos para o consumo humano perdíase ou desperdiciábase a nivel mundial, o que supón unhas 1.300 millóns de toneladas anuais.
Pola súa banda, o chef Roberto Filgueira puxo o foco no valor do produto de tempada, como as mazás e as castañas, destacando o seu aproveitamento total, mesmo as pezas menos "perfectas". Tamén sinalou a posibilidade de conxelar froitas e hortalizas para a súa posterior utilización e apelou á solidariedade e empatía neste compromiso contra o desperdicio.
Filgueira valorou como o rural favorece o aproveitamento do 100% do produto, pondo como exemplo o uso de restos orgánicos para alimentar o gando, e subliñou a importancia da proximidade, calidade e prezos asequibles de produtos como as castañas para a cociña galega.
