Dúas mulleres resultaron feridas este venres, unha delas de carácter grave, tras sufrir un accidente na estrada LU-651, preto da entrada ao núcleo de Folgoso do Courel. O suceso produciuse ao saír da vía co coche, que acabou envorcado nunha cuneta.

O accidente tivo lugar ao redor das cinco da tarde. Ata o lugar desprazáronse efectivos do Grupo de Emerxencias Supramunicipais (GES) de Quiroga, a Garda Civil de Tráfico e unha ambulancia do Punto de Atención Continuada (PAC) quirogués. Tamén se alertou aos bombeiros de Monforte, aínda que finalmente non tiveron que intervir.

A unha das feridas, a que presentaba feridas máis leves, atendeuna no centro de saúde de Folgoso tras unha primeira avaliación no lugar do sinistro. A súa acompañante, con lesións máis graves, foi trasladada en ambulancia ao hospital de Monforte.

Esta estrada rexistrou outro accidente similar a pasada madrugada do luns ao martes, a poucos quilómetros de Santa Eufemia, na mesma LU-651. Nese caso, a persoa que chamou ao 112 informou de que o seu acompañante estaba gravemente ferido e posiblemente atrapado, pero tampouco foi necesaria a excarceración.