A empresa Gestagua-Prace-Ingeser foi a que obtivo a maior puntuación na mesa de contratación, acadando 90,39 puntos, para o novo contrato do servizo de abastecemento e saneamento de auga en Poio. O acordo, que se levará ao pleno ordinario de setembro, ten unha duración de 25 anos e un valor estimado de 54,8 millóns de euros. Ademais, contempla investimentos por valor de 15,4 millóns de euros destinados á ampliación e mellora das redes municipais de saneamento e abastecemento.
O alcalde, Ángel Moldes, destacou a importancia deste contrato, cualificándoo como "un dos máis importantes deste mandato" polo seu impacto na calidade de vida da veciñanza. Sinalou que este acordo permitirá comezar a resolver necesidades que Poio leva anos arrastrando.
O procedemento de licitación atraeu un notable interese, con once empresas presentando ofertas, o que o Concello considera un reflexo da transparencia e rigor do proceso. Segundo os datos municipais, ningún outro concurso destas características en España nos últimos doce anos rexistrou tal nivel de participación. O alcalde subliñou que esta alta competencia é beneficiosa para conseguir un mellor servizo, condicións máis favorables e propostas innovadoras.
O rexedor agradeceu o traballo dos técnicos municipais na xestión dun concurso de gran complexidade. Moldes afirmou que a política municipal debe centrarse en resolver problemas e transformar o municipio, planificando e investindo para dar resposta a necesidades históricas.
As primeiras actuacións priorizarán as zonas de Vilariño e Fragamoreira, que carecen de redes de saneamento e abastecemento, así como A Caeira, afectada por roturas frecuentes. O investimento de 4,6 millóns de euros no primeiro ano centrarase nestas áreas e en rúas como San Antoniño, Río Miño e Illa de Ons. Nos anos seguintes, o investimento continuará coa mellora de redes en diversas parroquias e rúas do municipio, cun plan detallado para os catro primeiros anos.
O contrato tamén inclúe como mellora o novo depósito da ETAP e a conexión no Sartal. O alcalde concluíu que os 15,4 millóns de euros se traducirán en obras concretas que mellorarán o día a día e a calidade de vida dos veciños e veciñas de Poio.
