A primeira xornada de limpeza do río Gafos, organizada pola asociación ambiental Vaipolorío en Pontevedra, reuniu 33 persoas voluntarias, dez delas da Fundación Juan XXIII. Os traballos permitiron retirar 230 quilos de residuos, principalmente envases de plástico e vidro, toalliñas, panos de papel e calzado.
A actuación centrouse en varias zonas do contorno rural do río, incluíndo o sendeiro fluvial preto do albergue de peregrinos, o tramo ascendente desde a ponte da Condesa, e o treito medio-alto nas parroquias de Tomeza e Bértola, esta última en Vilaboa.
Na zona do Toxal, Vaipolorío alertou dos efectos da seca prolongada, observando amplos treitos do leito completamente secos. Exemplares de fauna fluvial como escaios, troitas e anguías, que aínda sobreviven nalgunhas pozas, corren o risco de morrer pola falta de auga e osixenación.
A asociación xa comunicou a situación á Xefatura Territorial da Consellería de Medio Ambiente en Pontevedra, solicitando unha intervención urxente para recoller e trasladar a fauna fluvial atrapada a espazos máis seguros. O voceiro da entidade, Xosé Feijóo, lembrou que o ano pasado a notificación se fixo máis tarde, cando xa se producira unha mortaldade piscícola, situación que se quere evitar este ano.
Vaipolorío tamén rexeita a circulación de bicicletas, motos e quads polos sendeiros do Espazo Natural de Interese Local (ENIL) do Gafos, xa que estas prácticas danan o contorno e alteran o ecosistema fluvial.
Ademais, a entidade amosa preocupación polo proxecto da Consellería de Medio Ambiente de construír tres pasarelas metálicas nas marxes do río, argumentando que poderían contribuír á "urbanización" do espazo. Vaipolorío proporá á Axencia Turismo de Galicia que as pasarelas sexan de madeira, para manter o carácter rústico da contorna.
