A actuación, cuxo prazo inicial de finalización estaba fixado para o 6 de maio, prolongarase finalmente ata o 6 de xullo. Esta decisión foi adoptada pola Xunta de Goberno local, que concedeu unha prórroga de dous meses á empresa adxudicataria, Novavial, tras constatar que os atrasos non son imputables á construtora.

Entre os factores que condicionaron o desenvolvemento dos traballos destacan as intensas e persistentes choivas rexistradas durante o inverno, especialmente nos meses de novembro, xaneiro e febreiro. Tamén influíu a aparición inesperada de grandes bolos de pedra de elevada dureza no subsolo, que afectaron tarefas clave como as escavacións e a instalación de canalizacións.

A retirada destas rochas obrigou a executar manobras adicionais non previstas, incluíndo operacións de carga e descarga e a reprogramación de cortes, o que contribuíu a demorar o ritmo da obra. A pesar diso, a empresa mantivo en todo momento os medios materiais e humanos necesarios, así como unha actitude dilixente para minimizar o impacto dos contratempos.

O proxecto, no que o Concello inviste 340.000 euros, transformará o entorno da fonte e o lavadoiro nun espazo de uso veciñal con novas zonas de ocio. Así mesmo, habilitarase unha vía de plataforma única con prioridade peonil no primeiro tramo da rúa Vilaboa e actuarase sobre os servizos básicos para corrixir deficiencias existentes.

Se se cumpren os novos prazos, Vilaboa contará este verán cun acceso renovado e adaptado ás necesidades actuais da cidadanía, mellorando significativamente a calidade de vida dos seus residentes.