O turismo atravesou unha zona de fincas, saíu voando varios metros e rematou sobre a cuberta dun alpendre. Os dous ocupantes, veciños da zona, resultaron feridos, aínda que puideron saír do vehículo por si mesmos. O condutor, de 22 anos, deu positivo no test de alcoholemia.
O suceso ocorreu pouco despois da medianoite do venres cando o turismo circulaba en dirección a Caión. A aparatosa traxectoria do coche rematou sobre un cobertizo, sen que as lesións dos mozos parecesen de excesiva gravidade.
Ata o lugar acudiron efectivos de Urxencias Sanitarias de Galicia-061, Garda Civil de Tráfico, bombeiros de Carballo, Protección Civil de Arteixo e A Laracha, ademais de servizos de mantemento viario. Trasladaron aos feridos a un centro médico.
Os bombeiros tiveron que estabilizar o coche no tellado do alpendre para preparar a súa retirada, minimizando os danos na estrutura.
Dúas horas antes, en Vigo, os bombeiros tiveron que excarcerar a un ocupante dun turismo tras chocar contra un autobús e unha farola na Gran Vía. Neste incidente tamén houbo dous feridos trasladados ao hospital.
