A feira, que tivo lugar do 21 ao 23 de outubro, reuniu a investigadores, adegas e empresas para compartir experiencias sobre innovación tecnolóxica e prácticas sostibles. A participación do proxecto, cofinanciado polo programa Interreg Sudoe, foi impulsada pola Mancomunidade do Salnés, socia do proxecto, que dispuxo dun espazo expositivo para dar a coñecer as súas iniciativas de investigación centradas na protección do solo, a valorización de residuos e a economía circular.
O venres 23 de outubro, os catro socios galegos do proxecto –Mancomunidade do Salnés, Misión Biolóxica de Galicia (MBG-CSIC), Paco & Lola e Fundación Juana de Vega– uniron forzas para fortalecer a colaboración entre o sector investigador, as adegas e as organizacións de desenvolvemento territorial.
Un dos eventos centrais de VINTEC foi a mesa redonda “Sostibilidade e reciclaxe nas adegas”, organizada pola Mancomunidade do Salnés. Nela, David J. Castro Mougán, presidente da Mancomunidade, e Juan José Villaverde, científico do MBG-CSIC e coordinador do proxecto, destacaron a necesidade dun enfoque integrado para unha viticultura máis sostible, que combine xestión do solo, redución de insumos, eficiencia hídrica e valorización de residuos.
A mesa tamén contou coas intervencións de Francisco García Verde (Syngenta), quen abordou o marco regulatorio europeo; Ángela Yusta (Paco & Lola), que compartiu a experiencia da adega na implementación dun modelo de economía circular; e Jorge García Caamaño (Aeromar Drones), quen presentou as posibilidades das tecnoloxías de precisión. Tamén participou César Carballo (ABANCA Agro).
A participación en VINTEC enmárcase nunha axenda de encontros científicos e sectoriais nos que os socios de Soil&WineResidues participan entre xullo e outubro de 2026, como o CIADICYP2026 en Austria, o Encontro Nacional de Solos en Alcoi, ou a Conferencia da Rede Española de Compostaxe en Granada.
