A asociación Vaipolorío deu comezo á 26ª edición das súas xornadas de limpeza do río Gafos, unha iniciativa que se remonta ao ano 2000. Na primeira xornada, celebrada este domingo, 33 voluntarios participaron na retirada de 230 quilos de residuos, aproveitando o baixo caudal do río neste momento do ano.
A asociación Juan XXIII renovou o seu compromiso coa limpeza, achegando dez usuarios da súa Fundación para colaborar nas tarefas que se estenden ao longo dos 11 quilómetros que conectan Vilaboa e Pontevedra.
Xosé Feijóo, secretario de Vaipolorío, mostrouse satisfeito co desenvolvemento da xornada, destacando a crecente concienciación cidadá sobre a importancia de manter o río limpo tras case tres décadas de esforzos. "A xente xa se vai concienciando, non ao 100% pero non é o de antes, nin moito menos", afirmou.
Feijóo tamén sinalou unha notable variación nos tipos de lixo atopados. "Empezamos a atopar xa hai dous ou tres anos lixo tecnolóxico. Algunha tablet e algún móbil teñen aparecido", asegurou, apuntando a unha nova forma de contaminación no ecosistema fluvial.
Ademais, o responsable alertou sobre a extracción de auga dos afluentes para abastecer vivendas próximas, o que reduce o caudal do río. "Non podemos tirar da auga doce como estamos tirando", recalcou, subliñando a importancia dos ríos sans para o medio ambiente.
Estas accións de limpeza prodúcense pouco despois de que a asociación alertase sobre o estado de seca no curso medio-alto do río, que ameaza a fauna e flora local. Feijóo lembrou que a alerta deste ano adiantouse case un mes respecto ao anterior, afectando non só aos peixes senón tamén a aves e mamíferos que dependen do río.
Ante esta situación, Vaipolorío solicita á Xunta de Galicia a reubicación das especies afectadas para garantir a súa supervivencia, á espera de que o caudal do río se recupere no inverno.
