A Boa Vila acolle a edición número 36 da Feira do Mel, un evento que atraeu a centos de curiosos ás inmediacións do Mercado de Abastos. A feira, que se celebra entre o 11 e o 14 de agosto, busca reivindicar a calidade da mel galega a través dunha ducia de postos dedicados á degustación e compra de distintas variedades, ademais de obradoiros e postos de venda de agasallos e outros alimentos gourmet.
Organizada pola Agrupación Apícola de Galicia xunto á Asociación de Apicultores da Provincia de Pontevedra (AAPP), a feira ofrece a posibilidade de degustar e adquirir meles locais a un prezo común de 7 euros o medio quilo e 12 euros o quilo.
Máis aló da mel, os diferentes postos presentan unha ampla gama de produtos derivados da colmea, como caramelos, hidromel, propóleo, velas artesanais de cera, xabóns, cremas e bálsamos labiais.
Destacan as meles monoflorais, procedentes do néctar dunha especie vexetal específica, como as de breixo, castiñeiro ou eucalipto, que presentan notables diferenzas en cor, sabor e textura. Tamén se poden atopar meles de distintas orixes xeográficas galegas, como Os Ancares, O Courel, Barbanza ou Val Miñor, e incluso de proximidade, a poucos quilómetros da cidade.
Un dos produtos que máis interese suscitou é a mel en panal, unha forma máis natural de consumila, sen oxigenar nin adulterar. Outra proposta singular é o vinagre con base de mel, dispoñible en sabores como boletus, mazá e laranxa.
A feira tamén inclúe a cervexa artesá Esmorga, de Ourense, que incorpora mel na súa receita, e unha variedade de produtos como aceites de oliva galegos, queixos artesáns, pementón da Vera e galletas de pan.
A programación complétase con catas comentadas de queixo e mel, así como un obradoiro de extracción de mel que se celebra diariamente.
