Esta actuación cumpre co compromiso adquirido polo conselleiro Román Rodríguez durante a súa visita ao centro o pasado agosto, de iniciar os trámites para contratar a obra neste ano 2026. A intervención suporá a renovación total da envolvente do único colexio de Infantil, Primaria e Secundaria deste concello coruñés.
O obxectivo principal é acadar un aforro enerxético do 30%, tanto en consumo de enerxía primaria non renovable como en emisións de dióxido de carbono. Isto traduciráse tamén nunha importante mellora do confort térmico diario para toda a comunidade educativa.
O programa de traballos inclúe a substitución de 1.942,83 metros cadrados de cuberta, 126 fiestras e cinco portas. Ademais, aplicarase un sistema de illamento térmico polo exterior tipo SATE en 1.886 metros cadrados de fachadas e instalaranse 626 novas luminarias de alta eficiencia enerxética e 179 luces de emerxencia.
O CPI Camiño de Santiago consta dun edificio orixinal con case 50 anos de antigüidade e dunha ampliación de finais dos anos 90. O illamento das fachadas e a renovación de carpinterías exteriores e luminarias afectarán a ambos edificios. A cuberta renovarase unicamente no edificio orixinal e nos patios exteriores. Tamén se colocarán falsos teitos en todo o centro e renovarase a chapa exterior da escaleira de emerxencia, entre outras tarefas.
