A Boa Vila abriu este xoves a programación cultural do Orgullo PTV+ coa presentación da instalación Orgullo PTV+ Referentes no balcón da casa consistorial. O acto inaugural, amenizado musicalmente por SenD-coro, serviu como punto de partida dun calendario de actividades culturais, reivindicativas e festivas que se prolongará durante todo o mes e culminará o próximo 27 de xuño coa Gran Festa do Orgullo PTV+ no Parque das Palmeiras.

Durante o acto de presentación, Anabel Gulías reivindicou "a importancia de reivindicar os dereitos de todas as persoas nun espazo moi simbólico como o Concello". "Pontevedra é unha cidade orgullosa e diversa durante os 365 días do ano", apuntou Gulías, que engadiu que "hai que deixar ben claro a todas as persoas intransixentes que non imos dar nin un paso atrás". Ademais, a edil animou á participación porque "non implicarse é ceder espazos e non estamos para iso, senón para ocupalos".

Tras a inauguración, a programación trasladouse á Casa das Campás, escenario do segundo evento previsto: a mesa redonda-vermú Con Franco NON viviamos mellor, organizada por Pinto e Maragota e protagonizada por Daniela Ferrández e Carlos Callón.

As actividades continuarán o luns 8 de xuño coa celebración do Día da Visibilidade Lésbica Galega. A Casa das Campás acollerá a charla 'A situación das mulleres lesbianas en Galicia', impartida por Marta Herraiz. Ao remate do encontro celebrarase un brinde en La Hormiga para conmemorar o 125 aniversario da voda de Elisa e Marcela.

A seguinte cita chegará o xoves 11 cunha nova mesa redonda centrada na presenza da comunidade cuir no folclore galego. Participarán Ana Canabal, Chechu Riquelme e Xandre Outeiro, novamente na Casa das Campás. Días despois, o luns 15, terá lugar unha andaina pola memoria cuir de Pontevedra organizada por Pinto e Maragota, mentres que o martes 16 se celebrará a charla Medrar sendo quen es: realidades trans. Familias e espazos seguros, promovida por ARELAS.

A Casa das Campás seguirá concentrando boa parte da programación durante esa semana. O xoves 18 acollerá a gravación en directo do podcast Referentes: Nacha Vestida de Azul e un encontro con Nacha Sánchez La Poderosa. Un día despois, o venres 19, será a quenda da exposición A cor como ponte, obra de Lucía Villar e Noa González, organizada por Feira Marica e comisariada por Carmen Romero na Confitería Landín.

A programación continuará o sábado 20 coa celebración da II Feira de Arte Marica nos Xardíns do Doctor Marescot durante todo o día. O martes 23 chegará unha das citas máis esperadas, o San Xoán Cuir, que incluirá un vermú organizado por Pinto e Maragota, música de DJ Beti de la Church e degustación de sardiñas en colaboración con La Hormiga no Campiño de Santa María.

As mesas redondas concluirán o xoves 25 coa charla Máis que canastras: identidade e xogo protagonizada pola xogadora profesional de baloncesto Paula Ginzo na Casa das Campás. O peche chegará o 27 de xuño co día grande do Orgullo PTV+. Ademais da manifestación, que partirá e regresará ao Parque das Palmeiras, o espazo acollerá unha xornada festiva dende a mañá ata a madrugada.