O pleno da Corporación de Poio acordou por unanimidade solicitar ao Goberno central a creación dunha nova saída da AP-9 en Portosanto, no punto quilométrico 130 en dirección Vigo. Esta actuación busca ofrecer unha alternativa rápida e segura ao nó de Bombeiros e á Barca, desconxestionando o tráfico na contorna e mellorando a mobilidade para veciños e desprazamentos laborais.
A proposta, impulsada polo alcalde Ángel Moldes, tamén pretende retirar tráfico dos accesos ás estradas PO-308 e PO-531, incluíndo vehículos pesados. Segundo a concelleira Rocío Cochón, no punto proposto xa existe un carril de incorporación á AP-9, e a nova saída requiriría un carril de deceleración e un vial paralelo que enlazaría coa PO-309. Este tramo da AP-9 é libre de peaxe e os terreos son de titularidade estatal, o que facilitaría a súa execución sen expropiacións.
Ademais, o acordo plenario inclúe a solicitude de instalación de pantallas acústicas para reducir o impacto do ruído da autoestrada nas vivendas e núcleos de poboación afectados. O Concello tamén pedirá unha reunión co subdelegado e o delegado do Goberno en Galicia para trasladar estas propostas.
A Corporación tamén instou á Xunta de Galicia e ao Goberno de España a estudar unha conexión directa entre a VG Campañó-Mosteiro e a AP-9, co obxectivo de mellorar a conectividade de Poio coa rede viaria de alta capacidade. Subliñouse que calquera trazado deberá contar co consenso da veciñanza afectada.
Por outra banda, aprobouse a sinatura dun novo convenio co Consorcio Galego de Servizos de Igualdade e Benestar para ampliar o programa Xantar na Casa, que pasará de 7 a 20 prazas. Este servizo é fundamental para garantir unha alimentación axeitada e mellorar a calidade de vida de persoas maiores e dependentes, permitíndolles continuar nos seus domicilios.
O novo convenio terá unha duración de catro anos, prorrogable, e o custo diario por persoa é de 7,34 euros, achegando o Concello e a persoa usuaria o 26,7% cada un, e o Consorcio o 46,6% restante.
Finalmente, aprobouse unha modificación de crédito para destinar 14.000 euros da subvención de Buxa Motor ao Obradoiro de Emprego Verde e Sostible. Tamén se reaxustaron anualidades do convenio con Augas de Galicia para o novo bombeo e depósito da Seca, e a mellora da estación de bombeo de augas residuais do Porto de Campelo.
