O Consello de Goberno do executivo autonómico deu luz verde ao convenio que permitirá executar esta actuación, que se financiará maioritariamente a través do Plan Hurbe. A intervención centrarase na renovación integral do firme e das beirarrúas neste espazo situado na parroquia de San Salvador, unha área con elevada actividade comercial e constante circulación de vehículos e peóns.
O obxectivo principal é reforzar a seguridade e a funcionalidade desta zona, que conecta directamente coa estrada PO-308 e funciona como un nodo urbano de referencia. O proxecto contempla a eliminación de barreiras arquitectónicas que actualmente dificultan a mobilidade, especialmente polos desniveis entre a calzada e as beirarrúas na explanada de estacionamento.
As obras incluirán o reasfaltado das vías, a reposición de pavimentos deteriorados e a mellora dos itinerarios peonís para garantir unha accesibilidade plena. A Xunta asumirá o 70% do custo, máis de 159.000 euros, e encargarase de licitar e executar os traballos, cun prazo estimado de tres meses. Pola súa banda, o Concello de Poio achegará o 30% restante, redactará o proxecto e farase cargo do mantemento posterior. O acordo terá vixencia ata finais de 2026 e subliña o papel do Plan Hurbe na mellora de espazos urbanos estratéxicos en Galicia.
Esta mellora complementa a reforma integral da PO-308 que o Concello leva a cabo desde hai anos. Estas obras entraron na súa recta final este mes no tramo entre As Bardancas e Combarro, que corresponde ao novo trazado reformado desde a glorieta da Variante Norte ata a zona da Pinela. A mellora do tramo da PO-308 comezou oficialmente a terceira semana de xaneiro de 2023, cun orzamento de 1,7 millóns de euros e un prazo de execución de 18 meses, que venceu en xuño de 2024. A empresa adxudicataria é Construcciones Taboada y Ramos.
Os principais obxectivos desta mellora da seguridade viaria eran habilitar un itinerario de uso mixto, tanto peonil como para ciclistas non deportivos, cunha lonxitude de algo máis de 1,6 quilómetros, que se estende de forma continua pola marxe esquerda (exterior) da estrada.
