Durante a mañá do venres, o equipo de Atlántida Productions, responsable do espazo, gravou no mercado, poñendo o punto final a unha serie de xornadas dedicadas a coñecer restaurantes, locais e enclaves emblemáticos da cidade do Lérez. O obxectivo foi difundir non só a súa gastronomía, senón tamén a súa beleza e historia.
Guillermo Campos, xornalista gastronómico orixinario de Pontevedra e director da revista Hostelería, Gastronomía & Turismo, foi o encargado de guiar ao equipo. Durante a gravación, repasouse a historia do edificio e as súas particularidades en comparación con outros mercados de abastos.
“"O mercado conta con dous capítulos importantes que son o da pesca de certo tamaño e os peixiños de baixura. O que supón, para min, a calidade do que vén e o coñecemento do que se selecciona. Algo que se corresponde cun acervo que ten a nosa cidade e que non o teñen todas."
Este ano, o mercado celebra o seu 140 aniversario, destacando a importancia do produto autóctono no seu ecosistema. Campos subliñou que, aínda que non debe confundirse cun centro cultural, o mercado debe ser un espazo onde a cultura subxaza, se renove e se actualice para que as novas xeracións comprendan que é máis ca un punto de negocio, con arraigamento, coñecemento e compromiso.
A presentadora do programa, Adrienne Chaballe, e o seu equipo percorreron os diferentes postos, mentres Guillermo Campos explicaba as peculiaridades de cada produto, centrándose especialmente nos propios da terra galega. A sección de peixaría tivo un protagonismo especial, onde a peixeira Sabela mostrou algúns dos produtos autóctonos máis demandados.
“"Pedíronme que lles ensinase un peixe que fose galego. Entón eu lles ensinei o Escacho ou Rubio, que é un peixe de rochas, semigraxo que na miña casa sempre se fixo en empanada ou en guiso e lles ensinei tamén un peixe que gusta moito aquí, sobre todo á xente maior, que é o Escarapote ou Gallineta; un peixe tamén de rocha, suavecito e aquí se adoita facer con allada, en caldeirada con allada."
