Despois dunha esixente semana con dous partidos, o Pontevedra CF prepárase para un dos seus desafíos máis importantes da tempada. Tras gañar ao Barakaldo (2-0) e caer ante o Arenas (1-0), o conxunto dirixido por Rubén Domínguez ten a mente posta no próximo rival, a Ponferradina, nun partido que se disputará o domingo 12 de maio ás 16:00 horas no estadio de Pasarón.
Aínda que o equipo lerezano xa superou os 45 puntos estimados para asegurar a permanencia, con 46 no seu haber, as súas aspiracións van máis alá. A pesar da recente derrota, o Pontevedra mantense empatado a puntos coa última praza de playoff e a só un punto do terceiro e cuarto posto. Este encontro contra a Ponferradina, que actualmente ocupa a terceira posición con 47 puntos, preséntase como o duelo máis directo na loita pola promoción.
“"Unha semana con tres partidos sempre é dura, pero a afrontamos con enerxía e alegría, que é como hai que facelo. Estamos nun tramo final moi ilusionante, con ganas de sumar e de terminar ben a tempada."
A plantilla mostrouse autocrítica coa actuación en Fadura. Yelko, xogador vigués, recoñeceu o desgaste físico de xogar tres partidos nunha semana, pero subliñou a importancia do próximo encontro: “Agora temos un encontro bonito este domingo, coa nosa xente e moitas ganas de que chegue, porque pode relanzarnos na loita polo playoff”. Pola súa banda, Montoro destacou a madurez do equipo para superar as adversidades e a importancia de sumar os tres puntos ante un rival directo.
A Ponferradina chega a Pasarón nun excelente momento de forma. Ocupa a terceira praza e é o equipo que máis puntos sumou na segunda volta da competición, con 27 puntos en 12 partidos. A súa solidez defensiva é notable, encaixando só tres goles nese período e manténdose invicta a domicilio desde o 4 de xaneiro. Este será un auténtico reto para o Pontevedra, que busca aproveitar o factor campo para superar a un dos equipos máis en forma da categoría.
