O conxunto poiense quedou a un só gol de acadar o ansiado salto de categoría, nun encontro moi intenso onde o resultado final, un 23-23, resultou cruel para as aspiracións do equipo dirixido por Víctor Castro. O equipo local, o Balonmán Villafranca, necesitaba o empate para ascender, mentres que o Poio Artai só lle valía a vitoria.

A tensión vivíase dende o inicio. Tras uns compases iniciais onde Cristian Bretal mantivo ao equipo en partido coas súas paradas, o Villafranca levou a iniciativa no marcador. A primeira igualada chegou no minuto 13, pero o cadro local recuperou a vantaxe para chegar ao descanso dous arriba (13-11).

Na segunda metade, o Poio Artai logrou a súa primeira vantaxe no minuto 48 (18-19), pero o Villafranca reaccionou rapidamente, volvendo poñerse por diante no minuto 51. A pesar do cansazo e da pouca rotación, os de Víctor Castro loitaron ata o final, logrando empatar o encontro a 22-22 no minuto 55.

Nos últimos minutos, o marcador volveu a igualarse. Un gol local puxo o 23-22 a falta de cinco minutos, e Álex Pombo logrou a igualada definitiva (23-23) case ao final. Nunha xogada confusa, cando o cronómetro non se detivo como solicitaban os colexiados, o equipo lanzouse ao ataque, pero o balón final de Marko Dzokic, tras unha falta sufrida por Damián, estrelouse nun rival cando a chicharra decretou o final do partido, esfumando o soño do ascenso.

O equipo recibiu o recoñecemento como subcampión da fase no pavillón Jorge Maqueda. Durante a entrega, Santi Picallo tivo un xesto de lembranza cara a Carlos Taboada, ex xogador do conxunto poiense falecido o pasado agosto, quen portou a súa sudadera.