O encontro, disputado no Municipal de Poio, comezou co equipo ourensán adiantándose no marcador grazas a un gol de Melli aos seis minutos. A pesar do tanto en contra, as xogadoras locais incrementaron a intensidade, buscando o control do xogo, mentres que as ourensás mostraron unha sólida defensa.

No tramo final da primeira metade, o Poio logrou o empate (1-1) aproveitando un erro na saída de balón da porteira rival. Pouco despois, a gardameta do Ontime redimiuse ao deter un penalti, mantendo o resultado igualado ata o descanso.

A segunda parte iniciouse cun Ontime máis centrado, que tivo varias ocasións claras, incluíndo dous remates ao poste. O partido incrementou o seu ritmo e intensidade, con ambos os equipos loitando por impoñer o seu xogo sen éxito ata os últimos minutos.

A falta de cinco minutos para o final, o Poio conseguiu poñerse por diante (2-1) tras unha boa combinación. Ante esta situación, o equipo ourensán arriscou co xogo de cinco, pero non obtivo o resultado esperado, encaixando dous goles a porta baleira que sentenciaron o partido cun 4-1 final, un marcador que non reflicte a igualdade do encontro.

Tras esta derrota, o Ontime mantense con 40 puntos a catro xornadas do remate da liga. O vindeiro sábado, as ourensás recibirán ao Castro en Os Remedios ás 17:00 horas.