O Concello de Redondela celebrou un acto oficial para entregar o diploma “Orgullo Redondelán” ao xove deportista local Iker Viéitez Domínguez. Con esta distinción, a administración municipal homenaxea publicamente a súa traxectoria no ciclismo en Pumtrack e, de forma especial, o seu recente título como subcampión de España 2026.
A alcaldesa de Redondela, Digna Rivas, e o concelleiro de Deportes, Antonio Cabaleiro, foron os encargados de facer entrega desta distinción en nome da corporación local. No acto, Iker estivo arroupado pola súa familia e concelleiros.
Con tan só 14 anos, Vieitez acumula un palmarés destacable. Foi Campión Galego nos anos 2024 e 2026, subcampión en 2025 e terceiro en 2023. Na Copa Galicia, logrou o título en 2025 e o subcampionato en 2024, mentres que na tempada 2026 marcha provisionalmente en segunda posición. A nivel estatal, tras un 4º posto en 2025, este ano proclamouse Subcampión de España 2026 na categoría Infantil.
“"Iker é o claro exemplo de que con traballo, constancia e ilusión non hai metas imposibles. Para Redondela é unha honra enorme contar con deportistas coma el, que non só levan o nome do noso concello ao máis alto do podio, senón que representan os mellores valores do deporte base e da nosa xuventude."
A alcaldesa, Digna Rivas, expresou o seu orgullo polo logro do mozo, destacando que representa os mellores valores do deporte base. Tamén tivo unha mención especial para a familia e veciñanza de Vilar de Infesta polo seu apoio. O concelleiro de Deportes, Antonio Cabaleiro, sumouse ás felicitacións e desexoulle sorte nos seus futuros retos.
