As obras de mellora urbana continúan esta semana en Pontevedra co asfaltado dun carril na avenida de Corvaceiras e outro na avenida do Uruguai. Na avenida de Corvaceiras, os traballos de fresado e pavimentación realízanse entre onte e hoxe martes. Na avenida do Uruguai, as tarefas centraranse no carril máis próximo ao río Lérez, entre a ponte da Barca e o náutico.
Para facilitar a mobilidade, establecéronse peches temporais dos carrís afectados, canalizando a circulación polo carril restante, xa que ambas as avenidas contan con dous carrís por sentido.
Estas actuacións seguen a liña das realizadas recentemente na rúa Doce de Novembro e na rúa Xosé Malvar. Unha vez finalicen as intervencións actuais, os traballos desprazaranse a outras rúas como José Adrio, a contorna da ponte dos Tirantes, Cobián Roffignac, Alameda, a avenida de Vigo, San Pedro Alcántara, Monteleón, Pedro Mariño de Lobeira, Celestino Poza, Uxío Novoneira, o barrio da Parda, Monte Porreiro, Estribela ou o Burgo, entre outras, antes e despois das Festas da Peregrina.
Paralelamente, o plan de mellora de firmes mantén a súa actividade no medio rural. Completouse o asfaltado do lugar do Marco (parroquia de Lourizán), entre os lugares do Bispo e Soutonovo (en Campañó), e tamén en Lampreeira (en Alba) e nos lugares de Banqueira e Barragáns. Esta semana comezará tamén a pavimentación do acceso ao novo campo de fútbol de Salcedo.
A renovación total da superficie de rodadura nos parques empresariais do Campiño e do Vao, que suma 43.806,3 metros cadrados, está prevista para o mes de agosto.
Este contrato de rehabilitación de firmes representa un investimento de 4.444.436 euros, a maior dotación económica na historia do Concello para seguridade viaria e mantemento da rede viaria municipal. O proxecto divídese en catro lotes adxudicados a dúas empresas: E.C. Casas encárgase do centro urbano (1.139.371 euros) e a zona periurbana e barrios (1.108.375 euros), mentres que COVSA executa o medio rural (1.124.685 euros) e os polígonos industriais (1.072.004 euros).
O plan abrangue un total de 191.304,5 metros cadrados de vías, case 40 quilómetros de estradas. A intervención inclúe non só a renovación do asfalto, senón tamén medidas de calmado de tráfico e a renovación completa da sinalización horizontal e vertical.
