O festival Armadiña Rock, que se celebra esta fin de semana en Combarro, contará coa presenza de dous Puntos Lila para previr e sensibilizar contra as violencias machistas, co obxectivo de garantir que as festas sexan espazos seguros e libres de agresións sexistas.
O primeiro Punto Lila situarase na Seca, preto da zona de acampada, operativo de 19:00 a 22:00 horas. Posteriormente, trasladarase á Praza da Chousa, onde funcionará de 22:00 a 02:00 da madrugada. Nestes puntos ofrecerase información, asesoramento e asistencia ás vítimas de agresións sexuais, en coordinación cos servizos de emerxencia e corpos de seguridade.
O Concello de Poio anima os asistentes a achegarse a estes puntos de información, subliñando a importancia da implicación colectiva para asegurar festas respectuosas. Ademais, estréase un novo aseo portátil adquirido polo Concello para eventos multitudinarios, buscando maior comodidade e aforro de custos municipais.
A seguridade do festival foi obxecto dunha reunión de coordinación celebrada este mércores, coa participación da Policía Local de Poio, Protección Civil de Poio, a Garda Civil e os organizadores.
En canto á programación musical, o festival destaca pola súa aposta por contido galego e bandas emerxentes, ampliando horizontes coa presenza do grupo portugués Abaixo Cu Sistema, tributo a System of a Down. O venres actuarán Rager, Ruxe Ruxe, Lisdexia e Orquestra Bravú Xangai. O sábado será a quenda de Noite Fechada, Malkeda, El 4º Sentido, Terapia de Grupo, Os Queimatas, Abaixo Cu Sistema, Pandereteiras do Ronsel, Balkan Bomba, Collón de Lola, Monoulious DOP, Pandereteiras de Armadiña e Bule. Tamén haberá Armadiña Crianzas con Migallas teatro e Terapia Kids. O domingo, Skadelos porá o broche final.
