A Deputación de Pontevedra organiza no Museo de Pontevedra a 16ª edición das Noites de Música Antiga, un programa de concertos centrado na música do período barroco. Do xoves 16 ao xoves 30 de xullo, o Edificio Castelao acollerá as actuacións de tres formacións especializadas. O ciclo está dirixido polo profesor da Universidade de Vigo, Luís Costa Vázquez. O acceso será libre ata completar a capacidade.
A xornada inaugural, o xoves 16 de xullo ás 19:00 h, correrá a cargo de Laia Terré e Lorenzo Ripol. Presentarán o programa ‘Diálogos do século XVIII’, centrado no violonchelo barroco e a súa expansión por Europa, con pezas de compositores como Francesco Geminiani, Giovanni Bononcini, Antonie Dard, Martín Berteau e Pablo Vidal.
Laia Terré, violonchelista con formación en varios conservatorios europeos e mestrado en Violonchelo Histórico, desenvolve unha intensa carreira centrada no repertorio temperán. Lorenzo Ripol, con estudos en Italia e Alemaña, afondou no coñecemento do repertorio e a interpretación histórica.
A segunda actuación será a da formación portuguesa Iberian Ensemble, o venres 24 de xullo ás 19:00 h no Edificio Castelao. O concerto centrarase no estilo galante, cun programa que incluirá pezas de Johan Joachim Quantz, Joan Baptista Pla, Josep Pla e Carl Philipp Emanuel Bach.
Iberian Ensemble, fundado en 2012 por Alexandre Andrade, ten participado en prestixiosos festivais de música antiga en varios países europeos.
O ciclo pecharase o xoves 30 de xullo ás 19:00 h co concerto ‘Unha viaxe pola Europa do Barroco’ a cargo de Teucro Trío. Interpretará pezas de Marco Uccelini, Francesco M. Veracini, Santiago de Murcia, Andrea Falconiero, Dietrich Buxtehude e Jacques Morel.
Teucro Trío está formado por Sergio Heredia (violín barroco), Fernando Reyes (guitarra barroca e tiorba) e Arquímedes Artal (viola de gamba), todos eles músicos con traxectorias destacadas na música antiga.
