Miguel Cuesta, quen se converteu nunha peza clave no esquema de Rubén Domínguez, foi o encargado de atender aos medios esta semana. O futbolista asturiano subliñou que “aínda queda o máis bonito” da tempada e que o conxunto granate debe manterse “ambicioso” para acadar o soño de disputar a fase de ascenso.

O soño de acadar o play-off está a tan só seis xornadas de distancia, nunha “recta final na que cada partido vai ser moi duro porque todo o mundo se está xogando algo”. Cuesta é consciente de que “unha boa racha pode permitirche meterte arriba e dar a sorpresa, unha mala racha pode condenarte e creo que nestes partidos romperase un pouco a táboa, pero nós temos que ser ambiciosos e creo que a ilusión non nos ten que gañar ninguén”.

O xogador granate sinalou que o Pontevedra CF comezou a crer nas súas posibilidades cando “encadeamos esa racha de cinco vitorias seguidas, xusto antes e despois de Nadal. Nese momento dixen que non era casualidade que o equipo fose terceiro e, a pesar de que é certo que ultimamente tivemos unhas rachas de non gañar moitos partidos, aí estamos outra vez pelexando”.

A importancia da última semana, na que o equipo sumou seis dos nove puntos en xogo, foi destacada por Cuesta. Esta boa dinámica permitiu ao Pontevedra regresar ás posicións de play-off, situándose na cuarta praza tras o empate entre o Real Madrid Castilla e o Ourense CF. O equipo afronta agora a viaxe a Guadalajara para enfrontarse a un rival que “se está xogando a salvación”, anticipando un “partido súper complicado e disputado”.

Este será o primeiro dos seis encontros restantes da tempada, tres dos cales se xogarán en Pasarón. Miguel Cuesta fixo un chamamento á afección para que “nos veña a empurrar como nestes últimos partidos, porque eu creo que son claves. Aquí somos moi fortes e temos que demostralo”.