O financiamento provén do programa Galicia Refuxio Climático e ten como obxectivo principal frear a erosión provocada polo mar, protexer os piñeiros situados no bordo litoral e mellorar a integración natural da contorna.
A actuación enmárcase nunha liña de axudas da Xunta destinada ao incremento da biodiversidade urbana, o aumento das zonas verdes e a mellora da conectividade natural entre espazos urbanos e periurbanos.
O proxecto contempla a creación dunha pantalla de contención con troncos de madeira de entre 25 e 30 centímetros de diámetro. Estes serán fincados na area e unidos con cordas, mentres que o espazo posterior será recheado con terra para protexer e apuntalar as raíces dos piñeiros.
Durante unha visita á praia, o delegado territorial da Xunta en Pontevedra, Pablo Fernández, destacou a importancia de impulsar "actuacións que permitan protexer e recuperar os espazos naturais e mellorar a súa integración coa contorna", así como medidas fronte á erosión e o cambio climático.
Fernández lembrou o compromiso da administración autonómica con iniciativas que contribúan a incrementar a biodiversidade, ampliar zonas verdes e mellorar a conexión entre espazos urbanos e naturais.
