O presidente da Deputación de Pontevedra, Luis López, anunciou este venres que o goberno provincial procederá á retirada do Libro de Honra da institución da dedicatoria asinada por Leire Díaz en abril de 2022. A firma realizouse durante un acto vinculado ao lanzamento dun selo conmemorativo da Catedral de Tui. Esta decisión será sometida á próxima Xunta de Goberno provincial.
Na rolda de prensa posterior á Xunta de Goberno, López xustificou a medida apelando á "boa imaxe" da institución e dirixiu críticas á anterior presidenta da Deputación, Carmela Silva, actual concelleira en Vigo e presidenta do PSdeG. O dirixente provincial referiuse á visita institucional de Leire Díaz e criticou a recepción que, segundo el, lle dispensou o anterior executivo.
López defendeu a retirada da dedicatoria argumentando que Leire Díaz "non merece nin un minuto máis" figurar entre as personalidades que asinaron no Libro de Honra. Lembrou que a firma tivo lugar o 26 de abril de 2022 e asegurou que naquela visita recibiu "todo tipo de declaracións de afecto" por parte de responsables socialistas, "declaracións e mostras de afecto que perduran nas hemerotecas e deberían provocar bochorno a algunha representante política desta provincia".
O presidente provincial tamén formulou preguntas ao goberno local de Vigo sobre o coñecemento que puideron ter das actividades atribuídas a Díaz. Criticou o silencio do PSOE ante o asunto e reclamou explicacións públicas, concluíndo: "Para un alcalde e unha concelleira tan dados ao confrontamento público acaso merece Vigo un silencio sobre todos estes escándalos que implican ao PSOE?. Eu agardo que teñamos unha resposta o máis inmediata posible".
