A Deputación de Pontevedra consolídase como un apoio para a mocidade coa aprobación do seu primeiro Plan Estratéxico de Xuventude e a posta en marcha de novas iniciativas deseñadas para atender as súas necesidades. Durante os tres anos de goberno de Luis López, creouse un servizo de Xuventude desde o que se impulsan axudas propias e programas pioneiros na historia da institución.
O presidente Luis López destacou a creación do servizo de Xuventude e Reto Demográfico como un gran acerto, enxalzando a primeira estratexia da institución provincial que sitúa á mocidade no centro das súas políticas. O deputado responsable da área, Jorge Cubela, subliñou que "a xuventude, o noso futuro, está atendida como nunca antes estivera pola Deputación de Pontevedra e seguiremos traballando nesta liña, convencidos, porque sabemos que este é o camiño para o avance da nosa provincia".
Ademais do Plan Estratéxico de Xuventude, puxéronse en valor novas liñas de axudas como o Plan +Xuventude, que impulsou preto de 60 proxectos xuvenís cunha distribución de máis de 200.000 euros. Outro programa, 'O teu espazo xuvenil', destinou preto de 45.000 euros á dotación de 22 locais para uso da mocidade.
Tamén se crearon programas como 'Vive o Rural', ao que se destinaron case 130.000 euros e do que se beneficiaron preto de 5.200 nenos e nenas. Os obradoiros 'En Plan Ben', centrados na saúde mental, impulsaron 30 accións formativas en 18 centros educativos. Pola súa banda, 'Xuventude a Máis' realizou 102 obradoiros dirixidos a concellos de menos de 20.000 habitantes. Programas xa existentes, como os Campamentos da Lanzada ou os Premios de Xuventude, viron reforzada a súa participación ata cifras récord.
O servizo de Xuventude e Reto Demográfico tamén puxo en marcha 'Pontevedra Literaria', que nas súas dúas edicións contou con figuras como Héctor Abad Faciolince, Manel Loureiro, Arantza Portabales, Ángela Banzas, Santiago Gamboa, Manuel Jabois, Laura Ferrero, Jorge Volpi, Ledicia Costas e Paloma Sánchez-Garnica. Ademais, constituíuse a mesa de emprego xuvenil e o programa '+Reto Dixital', con 41 accións formativas para máis de 50 anos, buscando combater a fenda dixital e a soidade non desexada.
