O paquete económico inclúe o reforzo do programa Lecer en Familia, que contará con 500 novas prazas ata alcanzar un total de 3.500. Esta iniciativa ofrece estancias en 12 establecementos turísticos das Rías Baixas para fomentar a convivencia familiar.
No ámbito do sector primario, aprobáronse 350.000 euros en axudas para 18 cooperativas agropecuarias situadas en once municipios, entre eles Cambados, Lalín, Pontevedra e O Rosal.
O plan de infraestruturas deportivas contempla actuacións en Bueu, para o acondicionamento das pistas de O Xistro, e en Ponteareas, para o proxecto do campo de fútbol de O Ravel.
Ademais, a través do Plan Máis Provincia, destinaranse un millón de euros a oito novas axudas en concellos como Dozón, Cerdedo-Cotobade, Tomiño e Salvaterra de Miño, cubrindo desde gastos correntes ata a renovación de parques infantís e accesos a polígonos industriais.
Finalmente, a institución provincial impulsará a modernización das policías locais en 59 municipios de menos de 50.000 habitantes mediante un servizo integral de software, cun orzamento de 2,5 millóns de euros.
