A concesionaria do abastecemento de auga, Veolia (anteriormente Viaqua), será a encargada de deseñar a nova infraestrutura. O concelleiro de Obras, Cesáreo Mosquera, confirmou que a empresa xa realizou unha primeira aproximación o ano pasado a petición municipal.

A obra prevé a instalación dunha nova tubería de 475 metros de lonxitude entre a rotonda de José Malvar e A Sequiña, chegando ata o embarcadoiro de piraguas da ponte Os Tirantes. A canalización contará con dous tramos de distinto ancho (1.200 e 800 milímetros) e un orzamento inicial estimado de 1,2 millóns de euros.

Este colector é un dos dous proxectados pola Xunta no estudo hidráulico da conca do Valdecorvos. O segundo, o de Padre Gaite, presenta máis complexidades, xa que o seu deseño depende de aclarar por que unha das dúas tuberías baixo as pistas de atletismo do Centro Galego de Tecnificación Deportiva (CGTD) está "seca".

Mosquera tamén sinalou que a execución doutras dúas obras de competencia autonómica, como a construción de muros de pedra no regato entre José Malvar e a zona cero de Casimiro Gómez, así como a creación dunha zona inundable no parque do Valdecorvos, aínda están pendentes de que os técnicos presenten anteproxectos.