O Centro Internacional da Creatividade de Pontevedra, situado no antigo conservatorio de música na rúa Alfonso XIII, xa ten nome e imaxe definitiva tras ano e medio de obras. O Concello de Pontevedra, representado pola primeira tenente de alcalde, Anabel Gulías, e o concelleiro de Cultura e Festas, Demetrio Gómez, anunciou que o equipamiento se chamará Maruxa Mallo, en honra á pintora surrealista galega.
O edificio, inaugurado en 1992 e baleiro dende maio de 2022, foi rehabilitado integralmente con fondos europeos Next Generation. A elección de Maruxa Mallo responde ao seu papel como figura representativa do surrealismo no Estado español e á necesidade de visibilizar a creadoras "silenciadas ou invisibilizadas", segundo destacou Gulías, quen tamén sinalou o seu compromiso republicano e feminista.
A imaxe gráfica do centro, deseñada pola empresa Era, inspírase na obra mariña de Mallo e nas súas iniciais, cun logotipo baseado nunha caracola invertida. Ademais, cada unha das oito plantas do edificio levará o nome dunha creadora destacada.
“"Tiñamos claro que queriamos que fose unha muller. Por iso escollimos Maruxa Mallo (...) foi unha das persoas que máis representaron o surrealismo no Estado español"
As creadoras homenaxeadas son, de abaixo a arriba: Mercedes Peón Mosteiro (música), Fina Casalderrey Fraga (escritora), María Xosé Queizán Vilas (escritora e referente feminista), Olga Amoedo (docente), Úrsula Kroeber Le Guin (escritora), Elena Vázquez Abal (catedrática), Lado - Aldao (proxecto artístico) e María Luz Morales (xornalista), a primeira muller en dirixir un diario nacional en España.
O protocolo de usos do centro, que definirá a creatividade dende unha perspectiva ampla incluíndo novas tecnoloxías, esixirá que a actividade se comunique en galego e se utilice linguaxe inclusiva. Tamén se regulará o uso da intelixencia artificial como ferramenta manipulada por humanos.
Os criterios de adxudicación para os proxectos que queiran ocupar o espazo inclúen a acreditación de "creatividade emerxente" e "impacto local", excluindo propostas que poidan xerar risco ou lexitimar discursos de odio. O Seminario Permanente de Jazz, inquilino histórico, ten o seu espazo garantido.
