A iniciativa, impulsada polo PSOE e apoiada polo PP coa abstención do BNG, insta o goberno local a reunirse "de maneira inmediata" cos propietarios afectados polas futuras expropiacións. O obxectivo é recoller as súas demandas e trasladalas á Xunta de Galicia, á que tamén se lle reclama que revise aspectos do proxecto para minimizar o impacto sobre propiedades privadas e garanta "un prezo xusto" ou compensacións axeitadas.
A moción tamén solicita á Consellería de Vivenda e Planificación de Infraestruturas que abra un proceso de diálogo cos afectados, explique o proxecto con detalle e estude posibles axustes. Contempla ademais que os propietarios de vivendas habituais expropiadas poidan recibir, se o solicitan, unha vivenda nova libre de protección. Demándase tamén unha ordenación urbanística "máis racional" no futuro barrio, favorecendo unha transición progresiva entre os edificios de maior altura e as zonas de vivenda unifamiliar xa existentes.
O PP, liderado por Rafa Domínguez, presentou unha emenda que pide ao goberno municipal iniciar "de maneira inmediata" a elaboración dun novo Plan Xeral de Ordenación Municipal (PXOM) para evitar situacións similares no futuro. O portavoz popular responsabilizou o alcalde, Miguel Anxo Fernández Lores, de non ter desenvolvido un novo planeamento urbanístico durante o seu mandato.
O goberno local do BNG optou por absterse, acusando PSOE e PP de "contradicción" por cuestionar agora aspectos do proxecto despois de apoiar a delimitación urbanística en 2025. O concelleiro de Urbanismo, Alberto Oubiña, cualificou o proxecto residencial de "estratéxico e fundamental" para Pontevedra ante a necesidade de incrementar a oferta de vivenda protexida, aínda que asegurou compartir as preocupacións dos veciños e apoiar as súas "reivindicacións xustas".
A conselleira de Vivenda, María Martínez Allegue, defendeu a "total transparencia e participación" por parte da Xunta e avanzou unha reunión con representantes do solo esta semana para dar a coñecer a iniciativa, que prevé a construción de 2.010 vivendas protexidas en colaboración público-privada en ámbitos que levan décadas sen desenvolverse.
