A nova caracterización completa, encargada por Portos de Galicia para cumprir co requirimento do Ministerio de Transición Ecolóxica, ratifica que “todas as zonas que se van dragar no ámbito desta obra clasifícanse como categoría A”, a máis favorable segundo a normativa vixente. A conselleira do Mar, Marta Villaverde, comunicou os resultados desta análise, que xa foran obtidos en catro campañas anteriores realizadas pola Xunta desde 2009.
A análise, contratada de inmediato por Portos de Galicia ante a esixencia do MITECO durante a fase de exposición pública do proxecto, foi remitida esta mesma semana ao Ministerio. Os resultados son coherentes cos obtidos nas clasificacións anteriores, resultantes das catas realizadas nos anos 2024, 2020, 2015 e 2009.
Marta Villaverde explicou que a clasificación final como categoría A vén dada pola media ponderada de cada zona, segundo a fórmula estandarizada que recollen as Directrices para a Caracterización do Material de Dragaxe.
Unha vez ratificados os resultados e remitidos a Costas do Estado, Portos de Galicia traballa para completar outro estudo solicitado pola dirección xeral de Biodiversidade do mesmo ministerio. Deste xeito, cumpriranse todas as esixencias do Goberno central para obter a Declaración de Impacto Ambiental (DIA) e poder licitar as obras en 2027.
A Xunta mantén a consignación económica necesaria para as obras, e os orzamentos de Portos de Galicia para 2027 incluirán unha partida de 12 millóns de euros para executar os traballos, respondendo a unha demanda histórica do sector portuario e marisqueiro da ría de Pontevedra.
