As entidades interesadas poderán presentar as súas solicitudes a través da sede electrónica municipal dende este luns, 5 de outubro, ata o vindeiro 26 de outubro, ambos os dous incluídos. O prazo de presentación é de 15 días hábiles.
Esta liña de axudas, cuxas bases foron aprobadas polo Pleno do Concello, está dirixida a proxectos e actividades realizados durante o exercicio 2025 que promovan a participación cidadá no tecido asociativo. A convocatoria abrangue trece áreas temáticas, dende a igualdade e a atención ás persoas maiores ata o medio ambiente ou a mocidade.
Cada entidade poderá recibir unha axuda de ata 3.000 euros. Dado o importe reducido, a subvención abonarase por adiantado e sen necesidade de constituír garantía. Poderán solicitala as asociacións e institucións de carácter social que estean legalmente constituídas e inscritas no Rexistro Municipal de Entidades Cidadás, cos datos actualizados, e que teñan xustificadas as axudas recibidas do Concello en anos anteriores.
A concesión das subvencións realizarase en réxime de concorrencia competitiva. Valorarase o interese xeral da actividade para o municipio, o seu carácter innovador, a continuidade no tempo e o uso do galego. Tamén se puntará a presenza de mulleres nos órganos directivos das entidades.
As bases completas da convocatoria están dispoñibles para a súa consulta no Boletín Oficial da Provincia (BOP), na páxina web do Concello, no seu taboleiro de edictos e no Servizo Sociocomunitario.
