O obxectivo desta actividade é que os participantes coñezan mellor os produtos do mar para aprender a escollelos, conservalos e incorporalos á alimentación diaria. A iniciativa, que se desenvolve durante o mes de outubro, combina coñecementos sobre alimentación saudable con formación práctica na cociña.
A primeira das catro sesións tivo lugar este venres, 2 de outubro, no Espazo Emprendedor do Parque Azul. O programa continuará os días 9, 16 e 23 de outubro, en horario de 16:30 a 18:30 horas. Este ciclo xa pasou previamente por Pontevedra e Poio.
Ao longo das xornadas, os asistentes abordarán cuestións como a planificación dunha dieta equilibrada, a selección e correcta conservación dos alimentos, e as propiedades nutricionais do peixe e do marisco. Estes coñecementos trasladaranse á práctica culinaria coa elaboración de diferentes receitas.
As 25 persoas participantes percorrerán todo o proceso, desde o coñecemento e a selección do produto ata a súa preparación na cociña, co fin de incorporar recursos aplicables á alimentación cotiá.
Marín retoma así o ciclo que xa pasou por Pontevedra e Poio, onde se desenvolveron oito sesións entre abril e xuño. Coa iniciativa, o GALP Ría de Pontevedra busca achegar ao territorio unha proposta que conecta alimentación saudable, gastronomía e produto local, promovendo o coñecemento e o consumo dos recursos pesqueiros e marisqueiros da ría.
Esta actividade enmárcase na Estratexia de Desenvolvemento Local Participativo (EDLP) do GALP Ría de Pontevedra e no seu traballo para pór en valor os produtos do mar e fortalecer a relación entre a cidadanía e o sector marítimo-pesqueiro.
