A Xunta de Goberno da Deputación de Pontevedra aprobou as bases reguladoras para o Campamento A Lanzada do vindeiro ano. O presidente do organismo, Luis López, destacou a importancia de comezar a traballar con antelación para manter a calidade desta proposta estival.
O campamento ofertará un total de 1.540 prazas dirixidas a nenas e nenos nacidos entre os anos 2013 e 2018. A maioría das prazas, 1.330, terán un custo de 110 €, reducindo a 80 € para familias numerosas ou monoparentais.
Ademais, reservaranse 210 prazas de forma gratuíta para menores en situación ou risco de exclusión social, que serán financiadas na súa totalidade pola Deputación.
A actividade desenvolverase ao longo do verán en 11 quendas de 7 días de duración, de domingo a sábado, comprendidas entre os meses de xuño e setembro. O prazo de presentación de solicitudes abrirase o 1 de marzo e finalizará o 22 do mesmo mes, unha vez publicadas as bases no Boletín Oficial da Provincia de Pontevedra.
