A iniciativa busca promover a cultura emprendedora nas aulas como motor de innovación, competitividade e creación de emprego. Os centros educativos interesados teñen de prazo ata o 22 de setembro para formalizar a súa solicitude.
O programa divídese en tres proxectos adaptados a diferentes etapas educativas. DepoEmprende na Escola, para Educación Primaria e Especial, permitirá a 16 centros crear e xestionar cooperativas para fabricar e vender produtos.
Pola súa banda, DepoEmprende na ESO acollerá ata 12 centros de 4º da ESO, onde o alumnado creará cooperativas para distribuír produtos segundo criterios de sostibilidade e responsabilidade social, desenvolvendo habilidades de negociación e toma de decisións.
Finalmente, DepoEmprende na FP está dirixido a 10 centros de formación profesional de grao medio ou superior, preferentemente a alumnos de segundo curso. Neste caso, a Deputación ofrecerá asesoramento para o desenvolvemento de proxectos que integren dixitalización e criterios ambientais, sociais e económicos.
A Deputación proporcionará aos centros participantes recursos e ferramentas, ademais de realizar un seguimento e avaliación continuos. A plataforma Portal Educativo de DepoEmprende servirá como ferramenta principal para a comunicación, acceso a recursos e titoría.
