O Concello de Pontevedra iniciou este domingo ás 7.00 horas o corte ao tráfico da rúa Cobián Roffignac co obxectivo de renovar o seu asfaltado. Estas restricións, que se prolongarán ata as 7.00 horas do luns, colleron por sorpresa a numerosos condutores que tiveron que buscar rutas alternativas para acceder aos garaxes ou saír da cidade.
A actuación está a ser levada a cabo pola empresa pontevedresa EC Casas. Forma parte dun dos catro lotes de renovación de firmes no municipio, cun orzamento total de 1.139.371,80 euros para mellorar o pavimento de 33 rúas do centro urbano.
A mesma empresa, EC Casas, tamén está a executar outro lote de asfaltado que inclúe 16 vías en barrios como A Seca, Monte Porreiro, Fonte Santa, Estribela, O Burgo e Campolongo, cun orzamento de 1.108.375,48 euros.
Os dous lotes restantes da renovación de firmes están a ser executados por outra empresa pontevedresa, Covsa. Esta firma encargaranse de cambiar os pavimentos nas pistas do parque comercial de O Vao e do polígono industrial de O Campiño, así como en 46 estradas do rural, por un importe conxunto de 2,19 millóns de euros.
