A polémica sobre a clasificación para o playoff de ascenso a Segunda División no Grupo 1 de Primeira Federación continúa. Tras coñecer que o Real Madrid Castilla ocupaba a quinta praza en detrimento do Pontevedra CF, a entidade pontevedresa remitiu un escrito á Federación Española de Fútbol (RFEF) mostrando a súa disconformidade.

Este luns, a RFEF comunicou a súa resposta ao club galego, informando de que traslada o documento presentado "ao Barakaldo CF e ao Real Madrid Castilla, outorgándolles de prazo ata as 18:00 horas do día de hoxe para que realicen as consideracións que entendan oportunas", segundo informou o propio Pontevedra CF a través das súas redes sociais.

Ademais, o club que preside Lupe Murillo sinalou que durante a xornada deste luns remitiu "documentación adicional complementaria ao escrito enviado na mañá do domingo, reforzando a interpretación regulamentaria defendida pola entidade".

O Pontevedra CF podería basearse en que as Bases de Competición de Primeira RFEF non establecen de forma clara o sistema de desempate, o que daría lugar a diferentes interpretacións. Unha delas suxire que o desempate por goal average podería darse entre os tres implicados no empate xeral (Pontevedra, Castilla e Barakaldo), sendo os granates os que teñen mellor diferenza de goles.

A entidade pontevedresa anunciou que "continúa traballando en defensa dos seus dereitos deportivos" e que manterá informados aos seus socios e afeccionados de calquera novidade oficial. Cabe lembrar que a conta de Primeira Federación en X xa anunciara o domingo que o Real Madrid Castilla xogaría a ida do playoff contra o Sabadell este venres.