O recoñecemento a Mario Gallego, profesor pontevedrés, céntrase nos seus 35 anos de dedicación á investigación e divulgación do encaixe. A súa paixón por esta arte comezou tras o seu destino no colexio de Camariñas (A Coruña), onde posteriormente participou na fundación do Museo do Encaixe. A homenaxe incluirá unha gran exposición da súa colección de pezas, que estará aberta ao público no recinto feiral durante o encontro.
“"O que ten na súa casa é un auténtico museo. Queremos honrar os seus 35 anos de traballo e darlle o espazo que merece."
A presentación desta actividade, considerada un referente a nivel estatal que congrega a un milleiro de palilleiras, tivo lugar este mércores. Contou coa presenza de Ale Rodríguez, Servando Rodríguez e Esperanza Marín, membros do colectivo de Monte Porreiro, xunto co alcalde de Pontevedra, Miguel Anxo Fernández Lores, e o concelleiro de Cultura, Demetrio Gómez.
Unha das principais novidades desta edición é a súa duración de tres días. Comezará o venres 24 de abril coa inauguración da exposición Dende antes ata despois, de Mario Gallego, e culminará o domingo 26 de abril co encontro de palilleiras, que se desenvolverá entre as 10:00 e as 19:00 horas. Ademais, o sábado, a programación incluirá unha charla a cargo de Alicia Sevilla, unha recoñecida artesá palentina especializada no perfeccionamento do encaixe.
“"Centra o seu traballo no inicio e no remate da peza. Porque facer metros por facer é fácil, pero o interesante é o punto de artesanía e de exclusividade de cada peza."
O tema central do encontro deste ano será a música, unha elección que dá continuidade ao Salón do Libro Infantil e Xuvenil e permite aproveitar parte da súa decoración. Esta temática busca tamén amosar ao público a versatilidade do encaixe, máis alá das puntillas tradicionais, presentando réplicas de instrumentos musicais con orixinais ao seu carón. As inscricións para o evento, que conta coa colaboración do Concello de Pontevedra, xa están pechadas debido á rápida cobertura das prazas dispoñibles.
