O plan de actuación, que complementa a renovación integral realizada en novembro de 2022, inclúe a instalación de pavimentos podotáctiles en andéns e vestíbulos para facilitar o tránsito de persoas con discapacidade visual. Ademais, incorporaranse bancos con apoio isquiático para mellorar o confort dos usuarios durante as esperas.

No ámbito da seguridade, o proxecto contempla a colocación de cámaras de vixilancia, detectores volumétricos e un novo sistema de alarma na planta baixa. Tamén se modificará o mostrador de información para restrinxir o acceso a persoas alleas ao servizo e instalarase unha barreira para o control de entrada dos vehículos.

As melloras esténdense aos aseos, que serán equipados con novos accesorios como cambiadores para bebés e secamanos. Así mesmo, a terminal contará con nova sinalética e pantallas informativas LED para os pasaxeiros, preparando a infraestrutura para o incremento de usuarios previsto de cara ao Xacobeo 2027.

As empresas interesadas en executar estes traballos, que teñen un prazo de tres meses, poden presentar as súas ofertas ata o próximo 16 de xuño ás 14.00 horas.