A pesar do excelente estado sanitario xeral das viñas na provincia, as condicións de humidade desta semana poderían favorecer a aparición de novos síntomas de mildio e oídio. O persoal técnico do Areeiro destaca que o albariño aínda non iniciou o pintado, un proceso que nas variedades tintas e rosadas máis temperás avanza lentamente. A previsión actual sitúa o inicio da vendima para finais de agosto ou principios de setembro, dependendo da climatoloxía.
Respecto ao mildio, as revisións confirman un bo estado sanitario, aínda que o patóxeno permanece activo debido á elevada humidade. Os síntomas limítanse, na súa maioría, a plantas sen tratamento ou a parcelas con intervencións deficientes. Recoméndase vixilancia permanente e actuacións só cando sexa necesario, ademais de manexar a vexetación para favorecer a ventilación dos acios.
No caso do oídio, detectáronse síntomas moi leves nunha viña do Salnés e en parcelas experimentais. A Deputación aconsella manter a vixilancia e continuar coas esfollas nas viñas con vexetación excesiva, xa que os acios seguen sendo susceptibles mentres non comecen o pintado.
Tamén se detectou un gran afectado por botrite tras a penetración dunha eiruga de Lobesia botrana. Observáronse ademais os primeiros rachos fisiolóxicos nos grans, que poden favorecer a aparición desta enfermidade.
Continúan os tratamentos obrigatorios contra Scaphoideus titanus, vector da flavescencia dourada, nas zonas demarcadas. As intervencións controlan as poboacións do insecto, pero insístese na importancia de respectar a pauta de tratamentos e eliminar cepas sintomáticas como medida preventiva ante esta enfermidade de corentena.
Esta semana tamén se observou un incremento de acariose e erinose. Ademais, aumentan os danos por golpes de sol, estrés hídrico e enfermidades da madeira. Como novidade, constatáronse os primeiros danos provocados por aves e avespas en acios, especialmente na comarca do Rosal.
Nas froiteiras, persisten os danos por insectos, aves e fungos de podremia, recomendándose retirar froitos afectados e caídos. No buxo, a bolboreta Cydalima perspectalis mantense estable. Nas nogueiras, comezou o voo da mosca da casca verde (Rhagoletis completa), aconsellándose instalar trampas e retirar froitos caídos.
