O delegado territorial da Xunta en Pontevedra, Pablo Fernández, xunto ao director xeral de Familia, Infancia e Dinamización Demográfica, Jacobo Rey, visitaron a casa niño de A Lama para coñecer de preto o seu funcionamento e o servizo que presta ás familias do municipio.
Durante a visita, os representantes autonómicos puxeron en valor o papel destas casas como recurso de atención á infancia, especialmente nos municipios de menor poboación. Facilitan a conciliación da vida familiar e laboral e achegan un servizo próximo ao lugar de residencia das familias.
As casas niño ofrecen atención e coidado a nenos e nenas de ata tres anos en pequenos grupos, nun contorno adaptado ás súas necesidades. Este modelo contribúe a garantir oportunidades para as familias do rural, favorece a fixación de poboación e a dinamización social dos concellos.
Pablo Fernández salientou o compromiso da Xunta de seguir reforzando os recursos destinados ás familias e á infancia, sobre todo no ámbito rural, para que vivir nun municipio pequeno non implique ter menos oportunidades ou servizos.
Pola súa banda, Jacobo Rey destacou a importancia de impulsar recursos que permitan ás familias compatibilizar a atención aos seus fillos e fillas coa súa actividade laboral, ao tempo que se favorece unha atención de proximidade durante os primeiros anos de vida.
