A iniciativa, que forma parte do proxecto Xenoma Galicia, busca identificar variantes xenéticas ligadas a enfermidades hereditarias como o cancro de mama e ovario, a síndrome de Lynch e a hipercolesterolemia familiar.
A selección de participantes realízase de forma aleatoria. A maioría das invitacións, 2.188, dirixiranse ao distrito sanitario de Ourense. Outras 277 chegarán ao Barco de Valdeorras e 241 ao de Verín. Espérase a participación final de 438 persoas de Ourense, 55 do Barco e 48 de Verín.
As persoas seleccionadas recibirán instrucións na propia mensaxe SMS e deberán tramitar a súa cita a través da aplicación Sergas Móbil. O persoal sanitario explicará os detalles do proceso, que non require xaxún.
O calendario de extraccións de sangue comezará no Complexo Hospitalario Universitario de Ourense (CHUO) entre o 7 e o 24 de setembro. Posteriormente, trasladarase ao Hospital Comarcal de Valdeorras os días 28 e 29 de setembro, e finalizará no Hospital Público de Verín entre o 30 de setembro e o 1 de outubro.
O obxectivo global do proxecto Xenoma Galicia, dotado con 20 millóns de euros pola Xunta, é recoller e analizar o ADN de 400.000 galegos para mellorar o coñecemento sobre as características xenéticas da poboación e desenvolver estratexias sanitarias baseadas nesta información.
