A asociación Arrolos de Teta organizou unha acción simbólica nas escaleiras da rúa Bailén en Ourense, coincidindo coa Semana Mundial da Lactancia Materna. O encontro reuniu a nais, bebés e familias co obxectivo de normalizar a lactación en espazos públicos, compartir experiencias e reforzar as redes de apoio durante a crianza.
Parvati Devi, nai e asesora de lactancia da asociación, explicou que o propósito é "reunirnos, estar xuntas, atoparnos con mulleres que hai máis ou menos tempo que non vemos e coñecer tamén as que se incorporaron ultimamente". Ademais, busca que as mulleres e os seus fillos "ocupen un lugar visible na cidade" e "ocupar o espazo público como mulleres e como nais, e que os nenos estean presentes".
Esta actividade forma parte dun programa que incluíu unha merenda familiar no Parque Miño e unha yincana temática no Xardín do Posío. Para hoxe, está programada unha charla aberta "Falamos de lactancia cas matronas" no Centro de Saúde Novoa Santos, onde se porán en común as necesidades detectadas por familias e profesionais para mellorar o acompañamento.
Devi sinalou que, a nivel social, houbo "un avance moi grande" e unha recuperación da "cultura da teta", con máis nais desexando amamantar e dispoñendo de máis información. Non obstante, non percibe unha evolución similar na atención sanitaria en Ourense, onde "seguimos atopando practicamente as mesmas carencias" e a solución depende moito das profesionais.
A asociación denuncia que ante problemas de lactancia, a resposta habitual é o biberón sen estudar a orixe. "Se un bebé non sobe de peso como se espera, a tendencia é suplementar directamente. Antes habería que observar unha toma, revisar o agarre e valorar outros indicadores", defendeu Devi, quen engadiu que algunhas mulleres acoden ao colectivo tras semanas de molestias e consultas sen solución.
“"A lactancia non ten que doer"
Para Arrolos de Teta, garantir unha elección libre esixe información científica, profesionais formados e unha rede de apoio sanitaria, laboral e social que non responsabilice ás nais ante os obstáculos.
