O Concello de Foz presentou o novo curso do programa socioeducativo Educando en Familia, que como principal novidade desta edición incorpora unha psicopedagoga. Este novo recurso permitirá ás familias recibir atención individualizada para a detección temperá de posibles dificultades na aprendizaxe, na linguaxe, TDAH, TEA ou altas capacidades dos seus fillos.
A concelleira de Servizos Sociais, Ana Rojo, explicou que esta iniciativa é de carácter público e totalmente gratuíta, dirixida aos menores e familias da localidade nas diferentes etapas de desenvolvemento, con especial atención ás idades de 0 a 6 anos. O obxectivo é ofrecer orientación e prevención, contribuíndo á colaboración, formación e apoio das familias, mesmo se acoden a outros centros escolares, para así reforzar e desenvolver plenamente as capacidades dos nenos e nenas a través de actividades adaptadas á idade de cada menor.
Ana Rojo destacou que dende a área de Servizos Sociais do Concello se pon en valor este consolidado programa centrado no benestar infantil e na educación emocional. Subliñou que non só está concibido para intervir cando xa existe un problema, senón que a súa vocación é principalmente preventiva e de acompañamento diario.
Entre as actividades programadas para este inicio de curso figuran charlas formativas en espazos grupais onde se comparten experiencias entre os proxenitores, impartindo valores como o afecto, o respecto, a igualdade e a inclusión, con dinámicas para facilitar a adaptación nas etapas educativas. Estas sesións presenciais, xunto cos espazos formativos, desenvolveranse nos centros do municipio Ceip Fondo Nois e Ceip O Cantel. O equipo de orientadoras do programa facilita a coordinación directa cos docentes, especialistas externos, técnicas do Concello, educadora familiar e traballadora social, combinando recursos para abordar intervencións integrais.
Ademais, a Concellería de Servizos Sociais apoia este programa co envío postal de correspondencia informativa ás familias de nenos e nenas de 0 a 6 anos, convidándoas ás vindeiras reunións informativas. Estas terán lugar no Ceip O Cantel o próximo luns 21 de setembro ás 16:30 horas e o día 1 de outubro no Ceip de Nois ás 15:30.
Para calquera información sobre este programa, as persoas interesadas poden chamar ao número de teléfono de Encarna, a mestra orientadora: 630.77.79.49.
