Veciños de Viana do Bolo espertaron na mañá do xoves 18 de xuño con graves desperfectos, dende inundacións de baixos e garaxes ata o desbordamento de ríos en Vilamartín de Valdeorras. A circulación viaria viuse afectada polo arrastre de materiais nas estradas. Estes incidentes son a consecuencia das intensas chuvias e tormentas da tarde do mércores 17, sendo as provincias de Ourense e Lugo as máis damnificadas.
A Axencia Estatal de Meteoroloxía (AEMET) activara unha alerta laranxa por chuvias e tormenta. MeteoGalicia informou na rede social X sobre a posibilidade de "chuvia moi forte e nalgunhas zonas torrencial entre o centro de Lugo e o sueste de Ourense". Nas últimas 24 horas, rexistráronse 5.990 raios, concentrados principalmente no leste da comunidade galega.
Os datos meteorolóxicos reflicten a inestabilidade. En Ourense, Viana do Bolo rexistrou a velocidade do vento máis alta con 71,6 km/h, seguida de Larouco con 64,2 km/h. En canto ás precipitacións, Vilardevós acumulou 41,1 L/m2 e Rubiá 31,4 L/m2.
Dende a asociación Amigas das Árbores sinalaron que os incidentes eran "unha crónica anunciada", atribuíndoos á xestión dos terreos afectados polos incendios do verán de 2025. Sosteñen que a falta dunha xestión axeitada dos montes calcinados incrementou a erosión durante a tempada de choivas, afectando a acuíferos e infraestruturas nas aldeas.
Para este xoves, MeteoGalicia activou unha alerta amarela por tormentas na montaña de Lugo, afectando os Ancares e A Fonsagrada entre as 15:00 e 21:00 horas, rebaixando o nivel de alerta tras o aviso laranxa do mércores. A AEMET non mantén ningunha alerta activa sobre Galicia. A Secretaría Xeral para o Deporte suspendeu a actividade deportiva federada e o programa Xogade no exterior, agás deportes náuticos e acuáticos, nas zonas afectadas.
