O xerente do Servizo Galego de Saúde (Sergas), Luis León, destacou hoxe no Parlamento de Galicia as medidas adoptadas pola Xunta para reforzar as urxencias hospitalarias de Ourense. Tal como adiantara o conselleiro de Sanidade, o Sergas convocará un concurso de méritos antes de finais de ano para dar cobertura estable a estas prazas.
León sinalou que este é un problema estrutural derivado das xubilacións, do incremento da demanda asistencial, do envellecemento da poboación e da escaseza de especialistas nalgunhas áreas clave. Tamén se revisou o plan funcional do Servizo de Urxencias, coa participación de profesionais, para mellorar os fluxos de pacientes, os circuítos asistenciais e a coordinación entre servizos.
Adoptáronse medidas organizativas, como o reforzo da garda da área médica, para mellorar a fluidez dos ingresos, axilizar a toma de decisións clínicas e reducir a presión asistencial.
Ademais, lembrouse que a Xunta aprobou melloras laborais e retributivas para os facultativos de urxencias, cun incremento duns 3.560 euros ao ano por profesional. Actualmente, o Sergas conta con 149 prazas máis de médicos de urxencias hospitalarias que no ano 2024, e recentemente incorporáronse 29 novos facultativos tras finalizar a súa formación especializada. Galicia xa forma aos primeiros especialistas en Medicina de Urxencias e Emerxencias para garantir o relevo xeracional.
