A empresa matriz de Perfumerías Avenida, o Grupo Recio, anunciou a presentación dun Expediente de Regulación de Emprego (ERE) que podería afectar a un máximo do 15% do seu persoal nas tendas. Isto supón arredor de 105 traballadores dos case 700 que compoñen o grupo, excluindo o persoal administrativo.

En Galicia, a cadea conta cunha trintena de establecementos, con especial presenza na provincia de Pontevedra e unha ducia de tendas en Vigo, ademais de puntos de venda na Coruña, Ourense e Lugo.

O novo CEO, Javier Alonso, sinalou que esta medida responde á transformación do sector, marcada polo auxe do comercio dixital e o descenso das vendas dende a pandemia. A isto súmanse o impacto da inflación e o aumento de custos, que reducen os marxes de beneficio. O ERE, que se negociará durante aproximadamente mes e medio, afectará principalmente a vendedoras con longa antigüidade, aínda que a empresa asegura que se terán en conta as situacións persoais e se facilitarán medidas como a permuta entre empregados.

Ademais, o Grupo Recio confirmou que esta reestruturación levou á súa saída como patrocinador principal do equipo de baloncesto feminino de Salamanca, o Perfumerías Avenida, como parte dun proceso de cambio estratéxico do grupo.